كاميليا شحاته
قبل ما كتب عن رأى عن الموضوع ده يا ريت كله ينسى انى اسمى ماركو اعتبرنى اسمى توفيق او مجدى اسم كدا بين البينين ينفع يكون مسيحى وينفع يكون مسلم علشان محدش يقول انى بكتب علشان هيا مسيحيه..
التعريف بالمقدسه او الحاجه كاميليا شحاته : هي امرأه فى العقد الثالث او الرابع من عمرها متزوجه من كاهن ..
وفجاه اصبحت هذه المرأه هيا الشغل الشاغل لجميع المصرين ..ف اول من خرج فى مظاهرات من اجلها هما المسيحين واول من خرج فى مظاهرات من اجلها هما السلفين ..اذن المسيحين والسلفين ايد واحده ..علشان هما الاتنين خرجوا لهدف واحد ...ولنفس السبب ..المسيحين كانو فاكرينها انها اتخطفت ..طاب اتخطفت ليه يا اولاد علشان هيا مراه كاهن واكيد المسلمين عاوزين يخلوها تأسلم ويبقى كدا اتضربنا فى مقتل بس على مين ؟ هنهتف ونعلى ونتظاهر لحد ما امنا كاميليا تيجى ..وبروح بالدم نفديكى يا امنا ...والى ساعد على هذه الافكار قدس ابونا جوزها ...وبعدها خرجت مظاهرات تانى من السلفين ..بيشاركو اخواتهم المسيحين وبيقولو ..واحد اتنين اختنا كاميليا فين ...ما اجمل هذه الوحده الوطنيه والمشاركه الوجدانيه احبائى .....المهم ....كاميليا شحاته بعد عملو بلاغ اختفاء وبعدها رجعت لجوزها دى فيها حاجه يا شباب ؟ لحد دلوقتى لأ ..طلع بعدها كللام انها راحت الازهر وكانت عاوزه تشهر اسلامها ...بس جات تعليات من امن الدوله انها تتمنع من كدا ..؟ يعنى هيا كانت عاوزه تأسلم والامن منعها ...يعنى ايه ..يعنى الاغلبيه تكون مسلمه فى بلد زى مصر و واحده بتضطهد دينيا ومش عارفه تشهر اسلامها ؟؟ يجيى رد شيخ الازهر ويقول انها مجتش الازهر ..ولا كانت عاوزه تشهر اسلامها ..ويجى الدكتور سليم العوا ويقول انها عمرها ما بقيت مسلمه وهيا مسيحيه ...والى معيعرفش الدكتور سليم العوا الراجل ده صاحب مقوله انى الكنايس والاديره فيها اسلحه ...؟ طاب ده كلام حلو ايه الى حصل الموضوع خلص فى ايه تانى ليه الصداع ده ؟
اقولكم :السلفيين قالو لأ هيا مسلمه وشنوده مخبيها فى السجون داخل الاديره وفجأه عملولها فوتوشوب وخلوها تلبس حجاب ..لو انى شايف كان من الافضل تلبس النقاب زياده فى الحشمه والتعفف ...؟طاب وبعدين الست دى فين ؟
كاميليا تتطلع فى فيديو انتشر على اليوتيوب بتقول انها مسيحيه ..وانها متخطفتش ولا حاجه دى خلافات حصلت بينها وبين جوزها وبعدها محدش ليه دعوه بحياتها الشخصيه ...ده كلام سليم وحلو اوى ..كدا بقى الناس ارتاحت.
السلفيين : لأ هيا مجبره تقول الكلام ده اكيد الكلام ده تحت تهديد ....لأ مش هيا دى كاميليا شحاته دى واحده شبها ..كان الناس الى بتقول كدا كانت قاعده ليل نهار مع الحاجه كاميليا ...طاب وايه العمل ؟
السلفين مش هنسكت لازم نخلص اختنا كاميليا من قبضه الكفار ..هتعمل ايه يا شيخ الزغبى والله والله والله اذ لم يتم الافراج عن كاميليا خلال الايام لنزحف فى اتجاه الاديره لخروج اخواتنا المتأسلمات .....طاب وبعدين التهديد منفعش نعمل ايه ...احنا انشاء الله بعد صلاه الجمعه نتجه ناحيه الكاتدرائيه ونحاوطها ونصلى كمان قدامها ..يمكن يخافو ويطلعوها ..صلو قدامها لو انى انا شايف انى المفروض كانو يتظاهروا قدام مثلا وزاره الداخليه او مكتب النائب العام ..او ماسبيرو أو....أو....اماكن كتير اوى يا رجاله يعنى محبكتش قدام الكاتدرائيه ...طاب وبعدين لسه مطلعتش ..وكمان البابا شنوده مرضيش يستلم طلب النيابه لظهور كاميليا شحاته ..وكيل النيابه الى عمل الموضوع ده غالبا داخل نيابه بالواسطه ..هيا كاميليا دى مش ليه جوزها ..او بيت علشان يتقدملو طلب النيابه ..والله حاجه غريبه ؟؟
طاب احنا عاوزين كاميليا تخرج وتظهر وانتا مين انتا يا عم الى تطلب من واحده انها تخرج او تظهر ..هى مش مجبره بسبب هواجس جواك انها تخرج او تظهر ..؟
المهم ...هما الاقباط هيسكتو على محاصره الكاتدرائيه ؟؟ لأ مش هنسكت مظاهره مليونيه قدام الكاتدرائيه للرد على السلفين ...طاب وبعدين .....
احنا خلاص ..بنينا البلد ..قضينا على البطاله ...اقتصادنا قووى ....الامن مستتب ...الفلوس بتجرى فى ايدين الواحد مش عارف يوديها فين ...المستشفيات زى الفل ...الشعب كله فرحان ...مش فاضل بس غير مشكله بسيطه اووى .....الحاجه او المقدسه كاميليا ........مش كفايه ونركز ..مش كفايه ونشوف شغللنا ...والسلفين الى بيطالبو بظهور كاميليا ..ممكن يطالبو بالعمل ساعه اضافيه علشان نزود الانتاج ...البلد تولع علشان واخده ولا هتزود فى الاسلام ولا المسيحيه ...والدين فى القلب مش على البطاقه يعنى مسلمه فى قلبها او مسيحيه فى قلبها حتى لو الواقع عكس ذلك...
كفايه بقى ونركز شويه ...كفايه بقى بدل ميحصل الى انا مش بتمناه ...الاتنين يتقابلو فى وش بعض فى مظاهرتين عكس بعض وتبقى فتنه قذره ...وزى ما اجنمعنا على شى واحد وهوا كاميليا نجتمع على شئ واحد وهو انى البلد تبقى احلى وبكدا يبقى المصريين كلهم بقيو ايد واحد .
واخيرا....قلب الوطن مجروح لا يحتمل اكتر ..
(وزى ما اجنمعنا على شى واحد وهوا كاميليا نجتمع على شئ واحد وهو انى البلد تبقى احلى وبكدا يبقى المصريين كلهم بقيو ايد واحد .
ReplyDeleteواخيرا....قلب الوطن مجروح لا يحتمل اكتر ..)
عارف يا ماركو فعلا عندك حق فى كل كلمة قلتها وانا بصراحة شايف الموضوع كلو على بعضو هبل جدااا وتعدى على حرية الاخرين سواء من دول او من دول بدليل اللى انت قلتو دا
(الدين فى القلب مش على البطاقه يعنى مسلمه فى قلبها او مسيحيه فى قلبها حتى لو الواقع عكس ذلك...)
فعلا اش عرف اى حد هى ايه فعلا دى حاجة بينها وبين ربنا وربنا مش بينها وبين السلفيين ولا المسحيين
نفسى ننسى بقى كل العيجن دا والله عجين الفلاحة كمان
ربنا يكملك بعقلك يابرنس ومتخافش من طول مافيها ناس زيك كدا عمرها ماهتموت
اخوك حازم